काठमाडौँ, २२ पौष । काठमाडौँमा भारत घर भएका टेलर व्यवसायीबीच झगडा हुदा एक जना भारतीय नागरिकको मृत्यु भएको छ ।

प्रहरीका अनुसार बालाजु बाइपासमा मंगलबार राति दुई टेलर व्यवसायीबीच भएको विवादले उग्र रुप लिँदा अन्दाजी २३ वर्षका कलाम मियाँको मृत्यु भएको हो । अर्का टेलर व्यवसायी सुबोध शर्माले कपडा काट्ने कैँचीले मियाँको कोखामा प्रहार गरेका थिए । गम्भीर घाइते भएका मियाँलाई उपचारका लागि अस्पताल लगिएको थियो । उनको राति साढे १० बजे निधन भएको प्रहरीले जनाएको छ ।

घटनापछि भागेका शर्मालाई प्रहरीले बुधबार बिहान फर्पिङ्गबाट पक्राउ गरेको छ । मृत्यु हुने मियाँ र आक्रमण गर्ने शर्मा दुवै भारतको मोतीहारीका बासिन्दा हुन् । उक्त घटनाबारे थप अनुसन्धान भइरहेको प्रहरीले जनाएको छ ।