काठमाडौँ, १५ पौष । उद्योगमन्त्री तथा नेपाल कम्युनिष्ट पार्टी (नेकपा)का स्थायी कमिटी सदस्य लेखराज भट्टले दोस्रो संविधान सभा चुनावमा अध्यक्ष पुष्पकमल दाहाल प्रचण्डलाई धाँधली गरेर सिराहाबाट जिताइएको खुलासा गर्नुभएको छ ।

नेकपाका सुदूर पश्चिमका कार्यकर्ताहरुको राजधानीमा भएको भेलामा आपुर्तिमन्त्रीसमेत रहनुभएका नेता भट्टले चुनाव हारेपछि धाँधली गरेर प्रचण्डलाई जिताइएको खुलासा गर्नुभएको हो । उहाँले भन्नुभयो, ‘बत्ती निभाएर, बाकस साटेर प्रचण्डलाई सिरहाबाट जिताइएको हो । जहिले पनि क्रमभंग, धक्का, महाविपत्ति भन्नुहुन्थ्यो । जहिले पनि उहाँले महाविपत्ति ल्याउनुहुन्छ । अहिले पनि विपत्ति ल्याउन खोजिरहनुभएको छ । उहाँहरु माइतीघर मण्डलामा जानुभयो, हामी यहाँ छौं भन्नुपर्ने अवस्था उहाँहरुलाई किन पैदा भयो

भट्टले अवको चुनावपछि प्रचण्ड समुहलाई बत्ति बालेर खोज्नुपर्ने बताउनु भयो । उहाँले भन्नुभयो, ‘अब हामीले उहाँहरुलाई खोज्न जानुपर्ने भयो । देशका कुना काप्चामा उहाँहरु कहाँकहाँ हुनहुन्छ खोजेर ल्याउनुपर्ने दायित्व हाम्रो भएको छ ।’

प्रचण्डले ०४६ सालमा सेक्टर काण्ड गराएर मोहन वैद्यलाई पार्टी महासचिवबाट हटाएको स्मरण गर्दै भट्टले भन्नुभयो– ‘जनयुद्धको दौरानमा मारिएका पाँच हजारको मात्र जिम्मेवारी लिन्छु भन्नुहुन्छ । प्रचण्डजीमा आत्मबल नै छैन ।’